「大哨」朗拿度球員時代起孖當食生菜，估唔到依家貴為班主，一樣可以「梅開二度」！講緊嘅係佢名下球隊高士路，周四(22日)喺巴乙以3比0大勝華斯高後，提前7輪鎖定升班資格，係繼佢今夏名下華拉度列升上西甲後，另一球隊升上當地最高級別聯賽，可謂雙喜臨門。
朗拿度擔任華拉度列班主已經好多年，佢去年宣布斥資4億雷亞爾(約5.48億港元)收購高士路90%股份，正式入主呢支佢曾效力嘅巴西球會，今年初完成收購後，高士路表現如有神助，喺巴乙31場錄得20勝8和3負積68分領先，已經拋離第5位球隊23分，尚餘7輪之下成功升班。
朗拿度入場同球員一齊慶祝，佢話：「球迷先係主角，3年來佢哋活喺散班陰影下，當我收購高士路時，得到球迷極大支持，就算我要做一啲艱難決定，球迷都理解同支持，對球迷嚟講，今次係獎勵，亦係解脫。」
