曼城喺夏天轉會窗完結前，用1,500萬鎊收購多蒙特中堅文路爾艾簡治，呢位瑞士國腳一加盟即搶佔正選位置，上場歐國聯更帶領瑞士爆冷擊敗西班牙，難怪被英國傳媒譽為「今夏最抵玩收購」。

27歲嘅艾簡治加盟曼城後，立即連續3場正選幫球隊3連勝，強勢亦持續去到國家隊，上仗作客西班牙嘅歐國聯，艾簡治喺2次角球攻勢建奇功，先係直接頂入，再嚟就頭槌二傳隊友入波。艾簡治表示：「我嘅速度、體能同頭槌都唔錯，但我認為自己最大長處係預判能力，呢一點亦係哥迪奧拿對我有信心嘅原因。」

艾簡治喺曼城極速企穩陣腳後，被問到預期年底世界盃決賽周會有咩成績，呢位瑞士人氣球星表示：「冇人知道呢次旅程終點喺邊度，不過我相信瑞士可以有好高成就，冇錯，我想幫瑞士捧世界盃冠軍！」