法國中堅祖利斯古迪上仗歐國聯受傷，經檢查後證實左腳大腿傷患嚴重，預計要休息4至5個星期，至少會缺席巴塞隆拿未來7場大戰！連埋朗奴阿拿奧祖、法蘭基迪莊同迪比都喺國家隊受傷，巴塞隆拿今次國際賽損失慘重。
今夏高價轉投巴塞隆拿嘅祖利斯古迪，喺巴黎接受球會軍醫診治後，發現左腳大腿二頭肌撕裂，休息期預計為4至5個星期，周一(26日)會再做更加詳細嘅檢查。
巴塞隆拿10月份賽程緊密，就算祖利斯古迪「最樂觀」喺4個星期後復出，都會缺席7場賽事，當中包括歐聯分組賽2鬥國際米蘭，以及西甲「國家打吡」大戰皇家馬德里，若果要5個星期先至康復，仲會錯過埋歐聯對拜仁慕尼黑嘅重要賽事。
原文網址：祖利斯古迪抖1個月 至少缺席7場大戰 | on.cc東網 | 體波 https://hk.on.cc/hk/bkn/cnt/sport/20220925/bkn-20220925180424227-0925_00882_001.html
