衞冕嘅皇家馬德里周四(6日)凌晨喺歐聯F組賽事，主場2比1擊敗薩克達，3戰全勝穩坐榜首位置，拋離次席薩克達足足5分，出線機會高唱入雲。皇馬教練安察洛堤贏埋今場，歐聯累積102場勝仗，追平費格遜成為歐聯史上贏波最多領隊。

皇馬今場開波唔夠半個鐘頭，已有洛迪高高斯同雲尼斯奧斯祖利亞各入1球，雖然39分鐘被薩克達破蛋，但皇馬仍保持2比1勝果至完場。比數上皇馬雖然只係小勝，但佢哋全場佔壓倒性優勢，一共製造36次埋門，係近6屆歐聯單場最多攻門紀錄。

皇馬教練安察洛堤重掌皇馬教鞭後狂破紀錄，今場佢又達到另一里程碑，拎到執教生涯第102場歐聯勝仗，同曼聯傳奇費格遜並列史上第1位，依家執教曼城嘅哥迪奧拿亦有96場勝仗，之後就係雲格(86勝)同摩連奴(81勝)。