德甲球隊利華古遜今季成績差勁，聯賽排尾2陷入降班危機，周三(5日)凌晨歐聯亦吞波圖2蛋，據報球會已決定炒教練施奧亞尼，而新帥目標就係西班牙名將沙比阿朗素，消息指雙方有望達成協議。
利華古遜原本目標係早前被車路士炒魷嘅杜曹，不過杜曹已經拒絕聘約，《ESPN》消息指利華古遜轉向沙比阿朗素埋手，呢位40歲名將從未執教過一隊，但過去3年執教皇家蘇斯達B隊獲得極高評價，被讚擁有先進戰術思維，而沙比阿朗素亦覺得係時候挑戰頂級賽事，利華古遜帥位被視為合適開始。
沙比阿朗素上年曾經表示：「我要跟隨自己嘅步伐，而唔係畀人逼去做，我嘅目標係執教頂尖球隊，但唔會心急而勉強自己。」沙比阿朗素同期好友阿迪達、沙維都已經教緊歐洲大球會，沙比阿朗素亦準備加入戰團。
