歐聯H組賽事競爭激烈，頭2輪輸晒嘅祖雲達斯周四(6日)凌晨終於贏波，主場3比1擊敗海法馬卡比，同巴黎聖日耳門、賓菲加(同得7分)嘅距離拉近至4分，出線仲有一絲希望。

祖雲達斯今場靠迪馬利亞發動，佢35分鐘交出直線畀拉比奧特抽入，50分鐘又交出穿透性直線畀杜辛華荷域單刀建功，客隊75分鐘追番1粒，但迪馬利亞83分鐘開出角球畀拉比奧特頂入，祖記就憑迪馬利亞嘅「助攻帽子戲法」贏3比1。

過去4年歐聯只出現過3次「助攻帽子戲法」，而迪馬利亞就包辦2次，佢喺2019年為巴黎聖日耳門對布魯日亦有「助攻帽」，另一個係2021年嘅祖奧簡斯路(曼城)。迪馬利亞嘅精彩助攻，連杜辛華荷域都幫佢「擦鞋」慶祝！