英格蘭近年人才輩出，每個位置都有唔少球星可以選擇，唯獨前鋒哈利卡尼嘅地位無可取代，不過英格蘭今次歐國聯首次徵召艾雲東尼，前國腳希斯基就大讚修夫基「識貨」，直指呢位賓福特射手係哈利卡尼最佳接班人。
哈利卡尼除咗入波多之外，墮後校炮亦係佢一大賣點，英格蘭近年嘅後備前鋒好似卡維特利雲、奧尼屈堅斯、譚美阿巴謙等都唔係呢種類型，艾雲東尼今季7場聯賽有5入波同2助攻，希斯基就表示：「艾雲東尼踢得好有信心，佢同哈利卡尼風格好似，經常會返中場幫手連繫，亦可以殺入禁區攻門。」
26歲嘅艾雲東尼，媽媽有牙買加血統，早喺2年前開始，牙買加就至少3次邀請佢加入，不過當時仲喺英冠嘅艾雲東尼，已經決心要踢英格蘭國家隊，所以一直拒絕牙買加足總，今次入選英格蘭證明皇天不負有心人，艾雲東尼將以出戰年底世界盃決賽周為目標。
原文網址：艾雲東尼3拒牙買加 有望成卡尼接班人 | on.cc東網 | 體波 https://hk.on.cc/hk/bkn/cnt/sport/20220922/bkn-20220922141034898-0922_00882_001.html
